Hakεɲini kεnε ye kεnε ye, min bε yamaruya di jamanadenw ma, u k’u ka dekunw jira gɔfεrεnaman na kεnε kelen kan. A tako 24nan kεnε sigira kunun seyisebe /CICB la Bamakɔ, k’a kεnε ɲεmɔgɔya di minisiriɲεmɔgɔ Bubu Sise ma, minisiri caman fana tun b’ a kεnε kan. Ɲinan ta mɔgɔ welelen kεrεnkεrεnnenw tun ye Afiriki kelenyatɔn ka lasigiden Bari Kalikisiti Arisitidi ni hadamadenw ka hakε lafasalitɔn ɲεmɔgɔba Agibu Buwarε ye.
Ka kεɲε ni ɲinan ta cogoya ye, cakεda min ɲεsinnen don hakεɲini sεbεnw minεnni ma n’a bε wele nansarakan daɲε surun na (secrétariat permanent de l’EID), o ɲεmɔgɔ y’a jira ko hakεɲini sεbεn 465 de sera olu ma ɲinan, kasɔrɔ san 2018 ta bεnna sεbεn 454 ma. Jεkulu min bε kεnε in ɲεbilabaaraw kε n’a bε wele nansarakan na (commission préparatoire), wolomani ni sεgεsεgεli kɔfε, olu ye sεbεn 246 ta 465 in na, u k’a 219 tɔ si ma sarati dafa. O sεbεn 246 fana na, sεbεn 38 sugandira, minnu kɔnɔ kuma walanwalanna kεnε kan, a 208 tɔw bilala ka taa minisirisow la.
Nin hakεɲini kεnε in jalatigεkulu kuntigi tun ye Soyata Mayiga ye. A ka cεden tɔw filε : Madamu Hawa Nana Daboya, ale ye Togo jamana ka fɔkabεnna ye ; Katerini Soke, ale ye hadamadenw ka hakεɲinitɔn den dɔ ye ; Cεrino Hadi Camu, ale ye Mali silamεdiinε tɔnba ka ciden ye ; ka fara musow ka jεkuluba cidenw kan. Mɔgɔ jolen minnu tun bε nin jalatigεkulu in kεrεfε, olu tun ye minisiri kɔrɔ Gawusu Darabo ye kunnafonidilaw ka faganbulon tɔnden dɔ don, ani jamanadenw ka hakεɲini kεnε cakεda sekeretεri kɔrɔ Mahamadu Sisoko.
Baba Agibu Hayidara ye jamana fɔkabεnna ye, a y’a jira ko san duuru laban in kɔnɔ, jamanadenw bε k’u sendon hakεɲini kεnε in na kosεbε. A ko san 2015 ta la, sεbεn 206 sɔrɔla, a bɔra o la ka na 234 na san 2016, o kɔfε, san 2017 sεbεnw bεnna 290 ma, ka san 2018 ta kε 454 ye, ɲinan ta kεra sεbεn 465 ye. A y’a jira fana ko sεbεn ninnu fanba bε bɔ marabolow kɔnɔ, nka a ko musow ni maliden minnu bε kɔkan, k’olu senna ka suman hakεɲini kεnε ninnu kan.
